घडो संतसंग

Submitted by पुरंदरे शशांक on 29 January, 2018 - 08:10

घडो संतसंग

तुकोबाचा भाव । जिही सामावला । मज तो भावला । पांडुरंग ।।

ज्ञानियाचे प्रेम । मूर्तिमंत ठाके । विटेवरी निके । भीमातीरी ।।

नामदेव सखा । स्वयमेव झाला । कोण त्या विठ्ठला । जाणू शके ।।

संतांचे संगती । जाई पंढरीसी । अर्पावे स्वतःसी । विठूपायी ।।

न जाणे निर्गुण । नाकळे सगुण । एकचि ते खूण । शुद्ध भाव ।।

शुद्ध भाव एक । रूजता अंतरी । स्वये तो श्रीहरी । ठायी पडे ।।

संतमुखे वर्म । कळो आले साचे । येर ते न रूचे । कृत्रिमसे ।।

घडो संतसंग । सर्वदा विठ्ठला । न मागे तुजला । दुजे काही ।।

----------------------
निके = चांगले
साचे =खरोखर, नेमके

शब्दखुणा: 
Group content visibility: 
Public - accessible to all site users

_/\_

छान! Happy