जानेवारीमध्ये लदाख़मध्ये सायकलिंग

Submitted by मार्गी on 2 January, 2018 - 12:01

जानेवारीमध्ये लदाख़मध्ये सायकलिंगची‌ योजना

जानेवारीमध्ये जम्मू- कश्मीर राज्यातल्या लदाख़ क्षेत्राचं‌ तपमान -२० ते -२५ इतकं‌ कमी होतं. तेव्हा ह्या प्रदेशाचं मुख्यालय असलेलं‌ लेह फक्त विमानाने जगाशी‌ जोडलेलं‌ असतं. अशा वातावरणातही काही पर्यटक तिथे जाऊन तिथल्या हिवाळ्यात फिरतात. लेह आजवर दोनदा बघितलं आहे, पण ते तिथल्या उन्हाळ्यात. त्यामुळे एकदा ते हिवाळ्यामध्ये जाऊन बघायचं आहे. अशा प्रतिकूल वातावरणामध्ये जितकी शक्य असेल तितकी सायकल तिथे चालवायची आहे. लेहच्या जवळपास रस्ते सुरू‌ असतात. त्यामुळे लेहवरून निम्मू आणि शक्य असेल तर खार्दुंगला इथेही‌ सायकल चालवता येऊ‌ शकते. खार्दुंगला रस्ता मिलिटरीसाठी अतिशय महत्त्वाचा असल्यामुळे तो नेहमी सुरू ठेवला जातो. ५३०० मीटर उंचीचा खार्दुंगला हिवाळ्यातही सुरू राहतो. अर्थात् मध्ये मध्ये मोठ्या बर्फवृष्टीमुळे तो तात्पुरता बंदही होऊ‌ शकतो.

अशा वेळेस लदाख़मध्ये जाण्यामागचे काही हेतु असे आहेत-

१. हिवाळ्याच्या प्रतिकूल हवामानात तिथे लोक कशा प्रकारे राहतात, जवान आणि सेनेचे अन्य लोक तिथे कशा प्रकारे काम करतात, हे जवळून अनुभवणे.
२. तिथले लोक व सैनिकांशी २६ जानेवारीच्या कार्यक्रमात अनौपचारिक प्रकारे संवाद करणे.
३. शरीराच्या क्षमतांना आव्हान देणे व त्या क्षमतांची पारख करणे.
४. सायकलिंग नेहमी काही‌ संदेश देतच असते- पर्यावरणाप्रती संवेदनशीलता आणि फिटनेसबद्दल जागरूकता.


फोटो स्रोत: http://travel.paintedstork.com/blog/2013/02/leh-ladakh-winter.html

तयारी

अलीकडेच केलेल्या सायकलिंग मोहीमेनंतर ह्याची इच्छा झाली. पूर्वी जे घाट कठिण वाटायचे ते आरामात जमले तेव्हा वाटलं की, ह्याहून मोठ्या पर्वतावर सायकल चालवू शकेन. तेव्हाच हा विचार सुरू झाला. ह्यासाठी तयारी अशा प्रकारे केली-

- नियमित सायकलिंग; घाट रस्त्यावर सायकल चालवण्याची सवय
- सायकलिंगमधला स्टॅमिना वाढवण्यासाठी रनिंग सुरू केले व त्याचा मागच्या मोहीमेत बराच फायदा झाला. हळु हळु रनिंग वाढवून २१ किलोमीटर पळता आलं. त्यानंतर ग्रेड १ चा घाट असलेल्या सिंहगडावरही रनिंग करता आलं. त्यामुळे सायकलिंगसोबत रनिंग हाही तयारीचा भाग राहिला.
- योगासन आणि प्राणायाम

इतक्या थंडीसाठीची तयारी अजून सुरू आहे. कमीत कमी कपड्यांचे तीन- चार लेअर्स वापरावे लागतील. थर्मल आणि इनरसह तीन सॉक्स आणि रस्त्यावर चालताना गम बूट आणि नाक सोडून संपूर्ण शरीर झाकण्याची व्यवस्था करावी लागेल. आणि थंडीची खरी तयारी मानसिक असेल. थंडीचं इतका भीषण नाही, पण छोटा अनुभव पूर्वी घेतलेला आहे. डिसेंबरमध्ये बद्रीनाथजवळ गेलो असतानाची थंडी आठवते. पण तिथे उंची बरीच कमी होती; पण तरीही संध्याकाळी‌ साडेपाच वाजता रात्र होत होती. आणि थंडीमुळे एक प्रकारचा आळस येत होता.

ह्यावेळी कदाचित हेच आव्हान सगळ्यांत मोठं असेल. त्याशिवाय लेहमध्ये हिवाळ्यात व्यवहार 'थंडावतात.' त्यामुळे सोयी- सुविधांचीही कमतरता असते. सायकल मिळण्यामध्येही अडचणी आहेत. दिवस उशीरा सुरू होतो व लवकर संपतो. सायकलिंगसाठी जेमतेम आठ- नऊ तास मिळतील. ह्या सगळ्यासाठी तयारी करतो आहे. लेहमध्ये मागच्या वेळी जिथे थांबलो होतो- तिथेच चोगलमसर भागात मित्राकडे थांबेन.

सायकलिंगची योजना

पुणे- दिल्ली- लेह विमान प्रवास व २४ जानेवारीला सकाळी लेहमध्ये आगमन
२६ जानेवारीपर्यंत पूर्ण आराम ज्यामुळे शरीर त्या हवामानासोबत जुळवून घेऊ शकेल.
२६ जानेवारीच्या सार्वजनिक कार्यक्रमाला उपस्थिती आणि लेह गावामध्ये भ्रमण- सायकल मिळवण्याचा जुगाड
२७ जानेवारी- लेह गावामध्ये १० किलोमीटर सायकलिंग.
२८ जानेवारी- लेह- सिन्धू घाट परिसरामध्ये १० किलोमीटर सायकलिंग.
२९ जानेवारी- लेह ते निम्मू- चिलिंग सायकलिंग (४५ किलोमीटर). चिलिंगमध्ये मुक्काम
३० जानेवारी- चिलिंग- निम्मू- लेह परत (४५ किलोमीटर).
३१ जानेवारी- लेह ते खार्दुंगला रोडवर साउथ पुल्लूपर्यंत सायकलिंग.
१ फेब्रुवारी- खार्दुंगला जाण्याचा प्रयत्न. खार्दुंगला जाणे रस्ता सुरू असण्यावर अवलंबून.

२- ३ फेब्रुवारी राखीव दिवस. आणि ४ फेब्रुवारीला लेह- दिल्ली- पुणे विमानाने परत.

अशी योजना तर बनवली आहे, पण त्यामध्ये खूप जास्तifs and buts आहेत. शरीर इतक्या थंडीला किती सहन करू शकेल, अशा वातावरणात सायकल किती चालवता येईल ह्याबद्दल काहीच सांगता येऊ शकत नाही. ते तिथे गेल्यावरच कळेल. कदाचित हेही शक्य आहे की, सायकल कदाचित मिळणार नाही किंवा खूप जास्त रेट असेल, कारण सर्व दुकाने बंद असतात. सायकल नाही मिळाली तर लेहच्या आसपास पायी पायी‌फिरता येईल. किंवा जर त्सोमोरिरीला गाडी जात असेल, तर तिथेही जाता येऊ शकेल. पण रस्ता कधीही काही दिवसांसाठी बंद होऊ शकतो. त्यामुळे सर्व काही त्या वेळच्या परिस्थितीवर अवलंबून असेल.

पण जे काही असेल, हा एक अविस्मरणीय अनुभव नक्कीच असेल. . . .

माझ्या पूर्वीच्या मोहीमांबद्दल इथे वाचता येईल- www.niranjan-vichar.blogspot.in

Group content visibility: 
Use group defaults

एवढा आव्हानात्मक प्लॅन आखला आहेस तर इतके जर तर कशाला ठेवले आहेस. दोन वेळा जाऊन आलायस तर तुझ्या ओळखीचा एखादा माणूस नक्कीच असेल की, त्याला सांगून एखादी सायकल राखीव ठेवणे शक्य नाही का

सर्वांना धन्यवाद!

@ आशूचँप, हो, माझे दोन मित्र आहेत लेहमध्ये. एक चोगलमसरचा व एक हॉटेलवाला. मित्राने एक सायक दुकानवाला बघूनही ठेवला आहे. पण तो रेट बराच जास्त म्हणतोय. बाकीही पर्याय आहेत. ९९% सायकल मिळेलच. पण ह्या गोष्टी फोनवरून होत नाही आहेत. त्यामुळे तिथे गेल्यावरच ते कन्फर्म होईल.

लेह सायकल भ्रमंती साठी शुभेच्छा.

लेहमधे सायकल रेंटवर घेण्यापेक्षा तुम्ही तुमची सायकल विमानाने ट्रान्सपोर्ट करू शकता. अगदी अल्प दर म्हणजे १००० ते १५०० मधे सायकल ट्रान्सपोर्ट होतील. तसेच तुम्ही तुमचीच सायकल चालवाल आणि त्या सायकल ची तुम्हाला पूर्ण माहिती असेल.

विवेक मराठे ह्यांनी गेल्या महिण्यात सायकलवर मेघालय राज्यात प्रवास केला त्यांचा फेसबुक पोस्ट आहेत. त्या तुम्हाला उपयोगी होवू शकतील.

धन्यवाद!

@ मध्यलोकजी, वा! माहिती घेतो. त्यांना संपर्क करतो.

>जानेवारीमध्ये जम्मू- कश्मीर राज्यातल्या लदाख़ क्षेत्राचं‌ तपमान -२० ते -२५ इतकं‌ कमी होतं.
हे तापमान फसवं असू शकतं. वार्‍यामुळे विंडचील इफेक्ट मुळे हे (लोकल) आणखी १०-२० डिग्रीने आणखी कमी असू शकते. लोकल म्हणजे काही फुटांवर, (सगळ्या गावापेक्षा किंवा जिथे अधिकृत तापमान मोजतात त्यापेक्षा) खूप कमी असू शकते.
तुम्ही वार्‍याच्या विरुद्ध दिशेने सायकल चालवली तर त्यात आणखी वाढ होई शकते. त्यामूळे तुम्हाला प्रत्यक्ष तयारी (वारं असेल तर) -३० , -४५ ची असायला हवी. वाटेत काही झाले तर , तुम्ही कुणाला मदतीला बोलावणार, तुमच्या पर्यंत मदतीला कोण येणार आणि किती वेळात येणार याचे प्लॅनिंग पक्के हवे. काही हवामानात मदत यायला ५ मिनिटे उशीर झाला तर तुमचा जीव जाऊ शकतो हे लक्षात ठेवा.

कुठल्याही परिस्थितीत शरीर गरम राहण्यासाठी मद्य पिऊ नका. त्याने तात्पुरते गरम वाटेल पण खरेतर शरीराचे थंडी पासून रक्षण करण्याची शरीराची नैसर्गीक संरक्षण साधने असतात त्यावर वाईट परिणाम होईल.
http://mentalfloss.com/article/32256/does-drinking-alcohol-really-keep-y...

मी स्वत: शून्याखाली तापमान असणार्‍या भागात काही दशके रहातो. काल रात्री -२२ डिग्री सेल्सियस इतके कमी झाले होते. ही कुणीतरी सांगितलेली किंवा ईंटरनेटवर वाचलेली माहिती नाही. स्वतः या थंडीत राहण्याचा अनुभव आहे. शरीराचा कुठलाही भाग , नाक सुद्धा २०-३० मिनिटे उघडा राहिला तर फ्रॉस्टबाईटने कायमचा निकामी होतो. माझ्या एका शाळेतल्या मित्राची, भारतात हिमालयाच्या जवळ ट्रेकिंग करताना फ्रॉस्टबाईटने ३ बोटे गेली आहेत.

तुम्हाला नाऊमेद करण्यासाठी नाही तर तुमची काळजी वाटते म्हणून हे लिहिले आहे.

>२६ जानेवारीपर्यंत पूर्ण आराम ज्यामुळे शरीर त्या हवामानासोबत जुळवून घेऊ शकेल
नुसता आराम न करता प्रत्यक्ष सराव सुरु करा ज्यामुळे तुमच्या शरीराला खरी सवय होईल. विशेषतः खूप थंडीत आराम करताना शरीराने जुळवणे आणि सायकलींग करताना जुळवणे यात मोठा फरक आहे.

अरे वाह, फारच महत्त्वाची माहिती दिली अजयजी तुम्ही! मला ह्याची‌ जाणीव आहे. म्हणून मी चादर ट्रेक (गोठलेल्या झांस्कर नदीवर ट्रेक) केलेल्या दोन लोकांना अगदी ह्याबद्दलच विचारत आहे; त्यांचं मार्गदर्शन घेत आहे. तुम्हांला सविस्तर व्य. नि. करतो. आणि मद्यसेवनाचा तर प्रश्नच नाही! Happy
ह्या इनपुटबद्दल खूप खूप धन्यवाद!

सर्वांना नमस्कार. परवा माझ्या सासऱ्यांना पॅरालिसिस स्ट्रोक आल्यामुळे हॉस्पिटलला अॅडमिट करावं लागलं. आता ते रिकव्हर होत आहेत. पण ह्या परिस्थितीमुळे मला माझा लदाख़ टूअर कँसल करावा लागला. आपल्या शुभेच्छांबद्दल खूप खूप धन्यवाद. टूअर कँसल करावा लागला असला तरी ह्या प्रक्रियेमध्ये खूप शिकायला मिळालं. पुढच्या सायकल मोहीमेत त्याचा उपयोग होईल. नोव्हेंबर- डिसेंबरमध्ये उत्तराखंडमध्ये केलेल्या भ्रमंती व ट्रेकिंगबद्दलची लेखमाला घेऊन लवकरच येईन. खूप खूप धन्यवाद.

अरेरे! सासर्यांना लवकर बरं वाटू दे.
नोव्हेंबर- डिसेंबरमध्ये उत्तराखंडमध्ये केलेल्या भ्रमंती व ट्रेकिंगबद्दलची लेखमाला घेऊन लवकरच येईन>> नक्की लिहा.