कोणते हे शहर आहे...

कोणते हे शहर आहे,कोणता दर्बार आहे...
सूर्य मावळलाच नाही,पण इथे अंधार आहे!

पाय नाही ज्यांस त्यांचा,थांबला संसार आहे...
भाकरीवर मीठ-चोळा,पांगळा आधार आहे!

काळजाला काजळू दे,लाविला मी तीट नाही...
थांब थोडेसे सुखा तू,वेदना गर्भार आहे!

चालतो त्यांच्यासवे पण,सारखा का थांबतो मी...
वाट त्यांची वाकडी अन्,पाय हा लाचार आहे!

पेटले नाही दिवे तर,सूर्य मी होणार आहे...
मागणे नाही कुणाला,सांगणे साभार आहे!

युद्ध माझ्याशीच माझे,चालले झुंजार आहे...
जाणिवांना जाग आहे,लेखणीला धार आहे!
-सत्यजित