'बुकारु'- छोट्यांचा साहित्यमेळावा (Bookaroo Children's Literature Festival)

३१ जानेवारी व १ फेब्रुवारी २०१५ या दोन दिवशी 'बुकारु' (Bookaroo Children's Literature Festival) या छोट्यांसाठीच्या साहित्यमेळाव्याला माझ्या मुलाला घेउन जाण्याचा योग आला.

अत्यंत सुरेख संयोजन, मुलांचा भरघोस प्रतिसाद आणि उत्तम वक्ते यामुळे फार मजा आली. प्रत्येक दिवशी वेगवेगळ्या वयोगटातील मुलांसाठी प्रत्येकी ७-८ वेगवेगळे कार्यक्रम होते. त्यापैकी कोणतेही तीन निवडावे लागतात. ४ ते ६, ६ ते ८, ८ ते १०, १० ते १२ आणि १२ ते १४ असे वयोगट होते. त्यामुळे आपल्या वयाला साजेसे कार्यक्रम मिळाल्याने मुलेही पूर्णपणे रंगली होती. संपूर्ण कार्यक्रम विनाशुल्क होता. त्याचबरोबर पुस्त्क प्रदर्शन व विक्रीही चालू होती.

आम्ही निवडलेल्या कार्यक्रमात कथाकथन, लेखकांबरोबर गप्पा आणि प्रश्नोत्तरे, हस्तकला असे वैविध्य होते. मुख्य म्हणजे कार्यक्रमाच्या ठिकाणी फक्त मुलांनाच प्रवेश होता! संपूर्ण उपक्रम इंग्रजी माध्यमातूनच होता हे मात्र नमूद करावेच लागेल.

एका इस्रायली लेखकाची त्याच्याच पुस्तकावर सही व संदेश वगैरे घेऊन आल्याने चिरंजिव फारच खुशीत होते! मुलांना वाचनाची आवड असेल तर ती अजून वाढण्यासाठी आणि नसेल तर ती निर्माण होण्यासाठी असे उपक्रम फार प्रभावी ठरावेत.