" सुसंवाद "

Submitted by अमेय२८०८०७ on 23 March, 2014 - 09:03

जिणे वाहताना दिशांच्या प्रवाही
तिला सापडू द्या तिच्या आतली
जरा साथ चाला हळू साद घाला
सखीला हवी ऊब स्पर्शातली

हसा संगतीने करा पूर्ण स्वप्ने
जणू राजकन्या असावी कुणी
तिच्या आसवांना असे मोल भारी
उन्हे दूर ठेवा तिच्यापासुनी

कडेलोट होतात साशंकतेचे
नसावे बघे भोवती वाटते
सुखे मौन पाळून कोषात जाती
रिते शल्य जेव्हा मनी दाटते

अशी वेळ येताच थांबून थोडे
पुन्हा घ्या उराशी निवारा धरा
तिला जाणवूदे नसे एकटी ती
सुन्या पाठिशी हात आहे खरा

सुसंवाद चालू अखंडीत राहो
गळू देत नात्यातल्या शृंखला
करा एवढे की तिचे हास्य लाभो
तुम्हा विस्मराया जगाच्या झळा

-- अमेय

Group content visibility: 
Public - accessible to all site users

वा वा !

फार सुरेख अमेयराव Happy

सुसंवाद चालू अखंडीत राहो
गळू देत नात्यातल्या शृंखला
करा एवढे की तिचे हास्य लाभो
तुम्हा विस्मराया जगाच्या झळा

या ओळी तर खुपच आवडल्या.

सुखे मौन पाळून कोषात जाती
रिते शल्य जेव्हा मनी दाटते

अशी वेळ येताच थांबून थोडे
पुन्हा घ्या उराशी निवारा धरा
तिला जाणवूदे नसे एकटी ती
सुन्या पाठिशी हात आहे खरा<<<

मस्त