"विचार__"

कोडे अवघड उलगडताना
कुठे न मिळती धागेदोरे
अखंड फिरती सूत्रे भरभर
धुंडाळत सुनसान किनारे .....

अविरत चर्चा, प्रश्न हजारो
यांचे काही त्यांचे काही...
अखेर हाती एकच उत्तर
"येथे नाही तेथे नाही.......!"

सत्याचीही वाचा गेली
उलटेसुलटे तर्क निघाले
उधाण भलत्या आरोपांचे
अफवेसरशी गेले आले....

स्वातंत्र्याची नाकाबंदी
कोणी केली कोणी केली?
अशी दुकाने कोणाची या
झंझावाताखाली आली....?

अजून कोठे ठिणगी विझली?
अजून वणवा शमला नाही
असा कधीही बळजबरीने
विचार केंव्हा सरला नाही...

भ्याडांनो लक्षात असू दया
अजून रण गारठले नाही
प्रकाश गिळणे आजवरीही
काळोखाला जमले नाही......!

विचार धगधगता अन हृदयी
ज्योत तेवती अखंड आहे
वार झेलण्या ध्येयासाठी
इच्छाशक्ती प्रचंड आहे......!

~ अनिल आठलेकर..