लागणारा वेळ:
४५ मिनिटे
लागणारे जिन्नस:
तूरीची डाळ एक वाटी
वालाची डाळ एक टेबलस्पून
मुगाची, मसुरिची वगैरे डाळी मिळून दोन टेबलस्पून
एक छोटे वांगे, एक छोटे रताळे, एखादा लहान लाल भोपळ्याचा तूकडा,
एखादा फ़्लॉवरचा तुरा.
समुद्रि मेथीच्या चार पाच जुड्या ( नसल्यास साध्या मेथीची अर्धी जुडी )
चिंचेचा कोळ दोन टेबलस्पून, चवीला थोडीशी साखर.
तूप, मीठ, हिंग, हळद.
मसाल्यासाठी
धणे एक टेबलस्पून
जिरे एक चहाचा चमचा, एखादी लवंग, दोन चार मिरीदाणे, अर्धा इंच दालचिनी.
दोन हिरव्या वेलच्या. चार पाच लाल मिरच्या. सर्व कोरडे भाजून पूड करावी.
(किंवा तयार पारसी धनशाक मसाला तीन चहाचे चमचे )
भातासाठी :
दोन कप बासमति तांदूळ ( धुवुन अर्धा तास भिजवून निथळून घ्या ), दोन मोठे कांदे (उभे चिरुन), तूप, मीठ, हळद, खडा मसाला ( आवडीप्रमाणॆ )
क्रमवार पाककृती:
सर्व डाळी एकत्र करुन धुवुन घ्या. त्यातच वर सर्व भाज्या चिरुन घाला. मग हळद हिंग घालून कुकरमधुन शिजवून घ्या. शिजल्यावर भाज्या वर राहतील, त्या बाहेर काढून घोटून घ्या. शक्यतो मिक्सरमधुन काढून घ्या, म्हणजे त्या एकजीव होतील. तूप गरम करुन त्यात वरील मसाला घालून परता. मग त्यावर डाळ, भाज्या, कोळ व साखर घाला.
उकळू द्या.
भातासाठी:
तूप तापवून त्यात उभे चिरलेले कांदे सोनेरी करुन घ्या. ( कांद्यावर थोडेसे मीठ व थोडी साखर पेरा ) कांदा काढून आवडीप्रमाणे खडा मसाला घाला, त्यावर हळद घालून तांदूळ परता. चार कप गरम पाणी घालून उकळी आली कि मीठ घाला. मोकळा भात करुन घ्या.
खायला घेताना भात वाढून वरुन डाळ घ्या.
वाढणी/प्रमाण:
चार जणांसाठी
अधिक टिपा:
व्हेज धनशाक हि खरे तर पळवाट आहे. मटणाशिवाय धनशाक होउ शकत नाही. तरीपण मग माझ्यासारख्या मंडळीनी काय करावे ?
माहितीचा स्रोत:
हं
