मिरच्या

मुळ्याचा ठेचा/चटका

Submitted by योकु on 27 March, 2015 - 11:58
लागणारा वेळ: 
२० मिनिटे
लागणारे जिन्नस: 

- दोन मध्यम आकाराचे मुळे, फार जून नकोत
- ५/८ तिखट हिरव्या मिरच्या
- पाव लहान चमचा हळद
- मीठ
- तेल
- मोहोरी
- जरासा हिंग
- थोडी बारीक चिरलेली कोथिंबीर

क्रमवार पाककृती: 

- मुळे धूवून कीसून घ्यावेत
- मिरच्या धूवून अगदी बारीक चिराव्यात. मिक्सरमध्ये नकोतच.
- चमचा - दीड चमचा तेल तापवावं. त्यात मोहोरी घालावी.
- तडतडली की चिमूटभर हिंग घालावा. लगेच बारीक चिरलेल्या मिरच्या घालाव्यात.
- जरा परतून मुळ्याचा कीस घालावा. परतावं.
- मीठ घालावं चवीपुरतं.
- झाकण ठेवून वाफेवर मुळा शिजवावा.
- ठेचा/चटका तयार आहे.
- वर थोडी कोथिंबीर पेरावी.
- हवं असल्यास वर लिंबू पिळावं.

वाढणी/प्रमाण: 
आवडेल तसं. मुळा आहे...
अधिक टिपा: 

- मुळा शिजवल्यानी अजिबात दर्प राहात नाही.
- हा चटका बर्‍यापैकी तिखट हवा तरच मजा येते. त्यामुळे मिरच्या घालण्यात कंजूषी करू नये.
- आपण डबा उघडला की बाकी लोक धारातीर्थी पडत नाहीत.
- लाल तिखट घालू नये. रंग बिघडतो.

पाककृती प्रकार: 
माहितीचा स्रोत: 
आजी

मका कणसाच्या दाण्यांची भजी

Submitted by प्रमोद् ताम्बे on 27 July, 2014 - 07:20
लागणारा वेळ: 
३० मिनिटे
लागणारे जिन्नस: 

साहित्य : दोन वाट्या कोवळे अमेरिकन मक्याच्या कणसाचे दाणे , अर्धी वाटी बारूक रवा, तीन कोशिंबीरीचे मोठे चमचे बेसनपीठ , तीन कोशिंबीरीचे मोठे चमचे भाजणी ,चवीनुसार आलें,लसूण व हिरव्या मिरच्यांची पेस्ट , एक चमचा जिरेपूड ,एक छोटा बारीक चिरलेला कांदा मूठभर बारीक चिरलेली कोथिंबीर , चवीनुसार मीठ व भजी तळण्यासाठी तेल.

क्रमवार पाककृती: 

कृती : मिक्सरवर मक्याच्या कणसाचे कोवळे दाणे भरडसर वाटून घ्यावेत. (फार पेस्ट करू नये, फक्त अर्धवट मोडले जातील असे वाटावे) , भरडलेल्या दाण्यांत बारीक रवा,भाजणी, चवीनुसार आलें,लसूण व हिरव्या मिरच्यांची पेस्ट, जिरेपूड, बेसनपीठ,बारीक चिरलेला कांदा व बारीक चिरलेली कोथिंबीर आणि चवीनुसारमीठ घालून मिक्स करावे. लागल्यास थोडे पाणी घालून दाटसर पीठ भिजवावे. पीठ पातळ भिजवू नये, चिकटसर असे भिजवावे. गॅसवर एका कढईत तेल गरम करून आच मध्यम ठेवावी. चमच्याने लहान लहान गोळे तेलात घालून भजी तळून घ्यावी.
हिरव्या पुदिन्याच्या चटणीबरोबर गरमच सर्व्ह करावी.

वाढणी/प्रमाण: 
चार व्यक्तींसाठी
अधिक टिपा: 

विशेष सूचना :
१) जर मक्याचे दाणे जून आहेत असे वाटले तर आधी थोडे वाफवून घ्यावेत.
२बेसन पीठा बरोबर आपण इतर पीठेसुद्धा वापरू शकतो. जसे तांदुळाचे, सोयाबीनचे पीठ. पीठाचे प्रमाण आवडीनुसार कमी-जास्त करू शकतो.
३) जर भजी तेलात फुटत असतील तर थोडे पीठ वाढवावे.

पाककृती प्रकार: 
प्रादेशिक: 
माहितीचा स्रोत: 
माझी पत्नी

वांग्याचे दहयातील भरीत

Submitted by प्रमोद् ताम्बे on 10 April, 2014 - 20:22

वांग्याचे दहयातील भरीत

साहित्य : भाजलेल्या एका मध्यम वांग्याचा गर (बलक) , एक मोठा बारीक चिरलेला कांदा , फोडणीसाठी तेल,मोहोरी,हळद,हिंग,जिरे, चवीनुसार हिरव्या मिरचयांचे तुकडे किंवा लाल तिखट , साखर , मीठ, जरुरीप्रमाणे दही , तीन मोठे चमचे शेंगदाण्याचे भरड असे कूट.

विषय: 

शेपूची परतून भाजी

Submitted by प्रमोद् ताम्बे on 9 April, 2014 - 02:08

शेपूची परतून भाजी

 परतून भाजी.jpg
साहित्य : एक जुड्डी शेपूची पालेभाजी , ८-१० लसूण पाकळ्या,चवीनुसार मीठ व हिरव्या मिरच्या ,फोडणीसाठी तेल,मोहरी,हळद व हिंग

विषय: 

तडतड मिरची! (प्रायोगिक चिली पॉपर्स!)

Submitted by नीधप on 22 January, 2013 - 12:40
लागणारा वेळ: 
१ तास
लागणारे जिन्नस: 

७-८ लांबुळक्या पांढरट हिरव्या मिरच्या (चवीला माइल्ड ते मध्यम तिखट)
ऑलिव्ह ऑइल (ऑ ऑ)

१/३ वाटी हरभर्‍याचे दाणे
१ छोटा टोमॅटो
१५-२० पुदिन्याची पाने
पेराएवढे आले किसून
१ मोठी लसूण पाकळी
tadtadmirachi-tayari-1.jpg

अर्धी वाटी पातळ पोहे
१ चमचा फ्लेक्ससीडस
१ चमचा भोपळ्याच्या बिया
२ लाल सुक्या मिरच्या
tadtadmirachi-tayari-2_0.jpg
चवीप्रमाणे मीठ

२ चीझ स्लाइस

क्रमवार पाककृती: 

१. अर्धी वाटी पातळ पोहे, १ चमचा फ्लेक्ससीडस, १ चमचा भोपळ्याच्या बिया, २ लाल सुक्या मिरच्या हे सगळे तव्यावर कोरडे भाजून घ्या.
२. जरा गार झाले की मिक्सरमधून भरड वाटून घ्या.
३. १/३ वाटी हरभर्‍याचे दाणे, १ छोटा टोमॅटो, १५-२० पुदिन्याची पाने, पेराएवढे आले किसून, १ मोठी लसूण पाकळी हे सगळे मिक्सरमधून भरड वाटून घ्या.
४. दोन्ही वाटणे चार थेंब ऑ ऑ घालून व्यवस्थित मिक्स करून घ्या. याच वेळेला चवीनुसार मीठ घाला. पातळ पोहे असल्याने हे पटकन आळत जातं त्यामुळे मिरच्यांचे सिडींग आधी केल्यास बरे. नाहीतर थोडे पाणी घालून सारखे करायला हरकत नाही. सारणाची कन्सिस्टन्सी हवी. खूप पातळ नको.
tadtadmirachi-tayari-3.jpg

५. मिरच्या मध्यभागी चिरून बिया आणि शिरा काढून घ्या.
tadtadmirachi-tayari-4.jpg

६. चीझ स्लाइसच्या अर्ध्या सेमी जाडीच्या पट्ट्या कापून घ्या.
७. या पट्ट्या प्रत्येक अर्धमिरचीत एकेक अश्या भरा
tadtadmirachi-tayari-5.jpg

८. चीझच्या पट्टीनंतर सारण ओतप्रोत भरा.
tadtadmirachi-tayari-6.jpg

९. बेकिंग पॅन/ डिश ला ऑ ऑ चा हात पुसून घ्या.
१०. ओव्हन १७० डि से. ला २०-२५ मिनिटे चालवा.
tadtad-mirachi_0.jpg

११. खाण्याइतपत गार झाल्यावर हादडा Happy

वाढणी/प्रमाण: 
दोन तीन माणसांसाठी उत्तम स्टार्टर होऊ शकते.
अधिक टिपा: 

अनेक गोष्टींना अनेक सब्स्टिट्यूट करता येतील. करून बघा आणि कळवा Happy
दह्याचा बेस असलेल्या कुठल्याही चटणीबरोबर अफलातून लागेल.

पाककृती प्रकार: 
माहितीचा स्रोत: 
हालापिनो पॉपर्सच्या नेटवरच्या रेस्पीज आणि माझे प्रयोग.

मिरच्यांचे लोणचे - फेसलेली मोहरी घालून

Submitted by स्वाती_आंबोळे on 14 March, 2011 - 16:02
लागणारा वेळ: 
४५ मिनिटे
लागणारे जिन्नस: 

पाव किलो हिरव्या मिरच्या
अर्धी वाटी लाल मोहरी
एक टीस्पून हळद
दोन टीस्पून कच्चा हिंग
तीन ते चार टीस्पून मीठ
अर्धा टीस्पून मेथीदाणे
पाच-सहा लिंबांचा रस
एक टीस्पून तेल

क्रमवार पाककृती: 

मिरच्यांचे बारीक तुकडे करावेत. त्यात मीठ, हळद व एक टीस्पून हिंग घालावा. हे मिश्रण नीट एकत्र करून ठेवावे.
एक चमचा तेलात मेथीदाणे तळून घ्यावेत. हे तळलेले मेथीदाणे मिक्सरवर बारीक वाटून घ्यावेत. थोडा लिंबाचा रस घालून लाल मोहरी बारीक वाटून घ्यावी. मेथ्या आणि फेसलेल्या मोहरीची पूड मिश्रणात मिसळावी.
उरलेल्या तेलात एक टीस्पून हिंग तळून घ्यावा व तोही मिसळावा. वरून उरलेला लिंबांचा रस घालावा.
हे सर्व मिश्रण पुन्हा नीट एकत्र करून बाटलीत भरून ठेवावे.
वरून (हवी असल्यास) फोडणी थंड करून घालावी.

अधिक टिपा: 

काळी मोहरी वापरल्यास 'ती' चव येणार नाही. कडू व्हायची शक्यता जास्त. Happy
लाल मोहरी घेतांनाच एखादा दाणा चावून बघावा. तो तिखट लागला तर ती मोहरी वाटल्यावर चांगली चढते. (सुट्टी मोहरी मिळत नसेल तिथे हे जमणार नाही. पण भारतात जमेल.)
चवीनुसार लिंबू,मीठ याचे प्रमाण बदलावे.
लिंबूरसाऐवजी कैरीचा कीसही चांगला लागतो.

पाककृती प्रकार: 
प्रादेशिक: 
शब्दखुणा: 
माहितीचा स्रोत: 
आई

शिजवलेल्या मिरच्या

Submitted by लालू on 25 January, 2011 - 20:10
लागणारा वेळ: 
३० मिनिटे
लागणारे जिन्नस: 

१५-२० जाड, लांब मोठ्या हिरव्या मिरच्या
४ मोठे चमचे धणे
२ मोठे चमचे मेथ्या
१ छोटा चमचा बडीशेप
२ छोटे चमचे मोहरीची डाळ किंवा मोहरी
१ छोटा चमचा जीरे
अर्धी वाटी गूळ
अर्धी वाटी लिंबाचा रस
हळद
हिंग
मीठ
तेल

क्रमवार पाककृती: 

मिरच्यांचे देठ काढून मध्ये चीर द्यावी. मग आडव्या कापून चार तुकडे करावे.

धणे, मेथी, मोहरी, जीरे, बडीशेप थोड्या तेलावर भाजून घेऊन भरड पूड करावी.
यात गूळ आणि मीठे घालून हा मसाला मिरच्यांच्या तुकड्यांत भरावा.
पातेले किंवा कढईत दोन मोठे चमचे तेल घालून तापल्यावर त्यात थोडी मोहरी, हिंग, हळद घालावी.
त्यात मिरच्या टाकून परताव्यात.
मग लिंबाचा रस घालून झाकण ठेवून वाफ आणावी.
अधूनमधून परतावे.

मिरच्या अगदी मऊ शिजवू नयेत. रंग बदलता कामा नये.

थंड झाल्यावर काचेच्या कन्टेनरमध्ये घालून फ्रीजमध्ये ठेवाव्यात. १-२ आठवडे तरी टिकतील.

मुळात या मिरच्या तिखट नसतात, पुन्हा शिजवणे आणि गूळ इ मुळे हा पदार्थ झणझणीत नसतो.

mirachi1.jpg

वाढणी/प्रमाण: 
लोणच्याएवढे
अधिक टिपा: 

यासाठी एशियन दुकानांत मिळणार्‍या लांब हिरव्या मिरच्या घ्याव्यात. अश्या दिसतात.
http://www.bigstockphoto.com/image-10490210/stock-photo-fresh-long-green...

मसाला मिरच्यांत भरला नाही तरी चालेल. फोडणीवर टाकून मिरच्यांबरोबर नीट मिसळून घेतला तरी चालते.

यातच सुके खोबरे, तीळ भाजून घातल्यास भाजीसारखा प्रकार होईल. pablano, habanero मिरच्यांचा असा प्रकार चांगला लागतो.

पाककृती प्रकार: 
शब्दखुणा: 
माहितीचा स्रोत: 
व्हई.

रवा बेसनाचा शिरा आणि भरल्या मिरच्या

Submitted by दिनेश. on 15 December, 2010 - 12:00
लागणारा वेळ: 
४० मिनिटे
लागणारे जिन्नस: 

क्ष

क्रमवार पाककृती: 

क्ष

वाढणी/प्रमाण: 
चार जणांसाठी
अधिक टिपा: 

क्ष

पाककृती प्रकार: 

पंचामृती मिरच्या (फोटोसहित)

Submitted by दिनेश. on 5 December, 2010 - 09:59
लागणारा वेळ: 
४० मिनिटे
लागणारे जिन्नस: 

जाड्या बुटक्या ताज्या हिरव्या मिरच्या ३०,
तेल २ टेबलस्पून,
गोडा मसाला दिड टेबलस्पून,
जिरे १ टेबलस्पून,
पांढरे तीळ ३ टेबलस्पून,
हिंग १ टिस्पून,
हळद १ टिस्पून,
सूक्या खोबर्‍याचा किस ४ टेबलस्पून,
टॅमरिंड पल्प २ टेबलस्पून (किंवा चिंचेचा दाट कोळ अर्धा कप )
क्रंची पीनट बटर ३ टेबलस्पून (किंवा दाण्याचे कूट अर्धा कप )
बेदाणे अर्धा कप,
काजू अर्धा कप (वगळल्यास चालतील )
मीठ १ टिस्पून,
डिमेरारा (ब्राऊन) शुगर पाऊण कप (किंवा तेवढाच गूळ, बारीक करून किंवा साधी साखर )

क्रमवार पाककृती: 

पुर्वी आपल्याकडे मराठी लोकांत लग्नाच्या जेवणावळीत पंचामृत आवर्जून असे. त्या जेवणात (जिलेबी मठ्ठा, पुर्‍या, वांगी बटाटा भाजी, भजी, तोंडले भात, अळूचे फदफदे ईत्यादी.. ) हा प्रकार मस्तच लागत असे.
ह्या मिरच्या त्याच्याच प्रकार आहे पण, त्यामानाने कमी खटाटोपाचा. शिवाय दिसायला छान.

तर यासाठी,
मिरच्यांना एक उभी चिर देऊन, मीठ घातलेल्या थंड पाण्यात अर्धा तास बुडवून ठेवाव्या. मग निथळून घ्याव्यात. (असे केल्याने मिरच्यांचा तिखटपणा थोडा कमी होतो, पाण्यात नाही ठेवल्या तरी चालतील.)
तेलाची हिंग हळदीची फोडणी करुन त्यात जिरे टाकावे, ते फूलले कि तीळ टाकावेत व जरा परतावेत.
मग खोबरे घालून आणखी परतावे. गोडा मसाला टाकावा. (तूम्हाला हौस असेल आणि वेळ असेल तर हा मसाला थंड करुन प्रत्येक मिरचीत थोडा थोडा भरावा, पण तशी गरज नाही, मी केलेले नाही.)
मग त्यात मिरच्या घालाव्यात, जरा परतून दोन मिनिटे झाकण ठेवून जरा वाफ येऊ द्यावी.
मग त्यात चिंचेचा कोळ वा पल्प घालून कपभर पाणी घालावे. मग गूळ आणि बाकीचे घटक क्रमाने घालावे, हलक्या हाताने ढवळून झाकण न ठेवता मंद आचेवर शिजवावे.
तेल वेगळे दिसू लागेपर्यंत शिजवावे.
कुठल्याही मराठमोळ्या जेवणाबरोबर खाव्यात.
या मिरच्या आठवडाभर टिकतील.

वाढणी/प्रमाण: 
तीस भागिले खाण्यार्‍यांची क्षमता
अधिक टिपा: 

यात हवे तर बारिक चिरलेली कोथिंबीर घालता येईल, बारिक चिरुन तीळा बरोबर परतायची.
फोटो प्रतिसादात आहेत.

आहार: 
पाककृती प्रकार: 
प्रादेशिक: 
माहितीचा स्रोत: 
पारंपारीक पदार्थ आणि सध्या बाजारात उपलब्ध पदार्थ वापरुन केलेला प्रयोग.
Subscribe to RSS - मिरच्या