अंगाई गीत

पाळणा झुलू दे

Submitted by पाषाणभेद on 29 December, 2021 - 07:41

असा झुलू दे झुलू दे पाळणा झुलू दे
या पाळण्यात माझ्या बाळाला खेळू दे

माझ्या या अंगणी आला ग श्रीरंग
काय सांगू बाई माझ्या बाळाचे रंग
किती द्वाड तो धावतो घरात
आवरता आवरेना दिस जाई त्याचे संग

काय काय मागतो खायला प्यायला
लोणी श्रीखंड बासूंदी करंजी घेते मी कराया
रव्या बेसनाचे लाडू मोतीचूर भरपूर
केली खीर, कोशिंबीरी सोबतीला शेवया

माझ्या या बाळाला आयुष्य उदंड लाभू दे
असा झुलू दे झुलू दे पाळणा झुलू दे

असा झुलू दे झुलू दे पाळणा झुलू दे
या पाळण्यात माझ्या बाळाला खेळू दे

- पाषाणभेद
२९/१२/२०२१

शब्दखुणा: 

अंगाई

Submitted by पुरंदरे शशांक on 27 April, 2017 - 01:04

अंगाई

पाळण्यात चिऊताई
करीतसे गाई गाई
चांदो अाला अाकाशात
नीज कशी येत नाही

तारका या अाकाशात
झोपल्या गं किती गुणी
अजूनिया का गं जागी
अाज माझी परीराणी

खेळूनिया लपाछपी
चांदोबाही झोपी गेला
निंबोणीच्या झाडामागे
पार दिसेनासा झाला

नीज येते पापणीत
चळवळ थांबेना ही
मंद मंद झुलवून
अाई गातसे अंगाई

नीज येई डोळ्यावर
तरी खेळायचे हिला
झुलवून थके पार
डोळा अाईचा लागला..

शब्दखुणा: 

एका शब्दाची अंगाई

Submitted by सत्यजित on 2 April, 2013 - 02:40

"आई"

आई.... आई... आई
एका शब्दाची अंगाई

लहानपणी वाटायचं
कधी होईन मी मोठा
किती तरी असेल रुबाब
खिशामध्ये गच्च नोटा

खुप पैसे असले म्हणजे
किती किती मज्जा येईल
गोळ्या चिंचा बोरं चॉकलेटं
सारं काही घेता येईल

हट्ट सारे पुरवायचीस
कीती लाड करायचीस
शिंग अजुन छोटी आहेत
असं काहीस म्हणायचीस

तू कौतुकाने हसायचीस
कुशीत घेऊन बसायचीस
खुप मोठा हो रे राजा
कुरवाळत म्हणायचीस

कधी तरी शिंग फुटता
वाटलं मोठा झालो आता
मला सगळं कळतं बरं
काळजी करु नको आता

पंखा मध्ये बळ येता
पिल्लू घरटं सोडून उडतं
सुवर्ण कडांच्या नभांवर
त्याच तेंव्हा प्रेम जडतं

शब्दखुणा: 

मुलासाठी अंगाई गीत

Submitted by दर्शना पेडणेकर on 7 February, 2013 - 02:13

मुलाला झोपवण्यासाठी अंगाई गीते सुचवा. माझा मुलगा १ वर्षाचा आहे. त्याला गाणी एकायला आवडतात

विषय: 
शब्दखुणा: 

अंधाराचे अंगाईगीत

Submitted by सुसुकु on 23 October, 2012 - 17:44

अंधाराचे अंगाईगीत

उगी उगी रडू नको माझी बाळी
रडू नको आता फार रात्र झाली

बघ इक्डे तिक्डे सारी वाडी काळी
झाडे काळीकुळी सावलीही काळी
उभी शांत जशी पुतळा ती खेळी
रडू नको आता फार रात्र झाली

चांद नाही बाही नाही त्याची पाळी
नोकर हा जसा फिरती ही भाळी
आज दिस सुटीचा उद्या पळापळी
रडू नको आता फार रात्र झाली

नाही आई शेजी असे कामा गेली
काम असेही अन तसेही ह्या अवेळी
जशी तू तशी मीही जीव हा जाळी
(जसा मी तशी तूही जीव हा जाळी)
रडू नको आता फार रात्र झाली

शब्दखुणा: 

अंगाई गीत - जरा साजरासा...!!

Submitted by अभय आर्वीकर on 9 February, 2010 - 05:21

अंगाई गीत - जरा साजरासा...!!

कसा बाळ माझा? श्याम सावळासा
जरासा जरासा, जरा साजरासा...!!

चांदणे स्वरूपी चंदनाचे अंग
मुख पाहतांना तारकाही दंग
असा बाळ माझा, चंद्र गोजिरासा
जरासा जरासा, जरा साजरासा...!!

नेत्र काजळीले, तीटबिंदु गाली
टिळा देखुनिया दृष्टही पळाली
हसे बाळ माझा, विठू हासरासा
जरासा जरासा, जरा साजरासा...!!

ओठी अंगठ्याने करी सुधापान
तया चुंबण्याला लोभावते मन
दिसे बाळ माझा, राम सुंदरासा
जरासा जरासा, जरा साजरासा...!!

आली बघा आली, नीजराणी आली
मिटमिट पापण्यांची, पेंग लुब्ध झाली
निजे बाळ माझा अभय सागरासा
जरासा जरासा, जरा साजरासा...!!

गुलमोहर: 
Subscribe to RSS - अंगाई गीत