संकीर्तनी

ठोकत ठोकत टाळ
ते उड्या मारत होते
तारस्वरी तोंडपाठ
देवगाणी गात होते

शुभ्र टोप्या डोक्यावरी
शुभ्र स्वच्छ लेंगे शर्ट
गाली भाळी लाविलेले
शुभ्र स्पष्ट नाम बोट

असा देव भेटेल का
प्रश्न माझा शिकलेला
पुन्हा पुन्हा येत मनी
तोच करी जुना ताळा

पण बेभान गातांना
त्यांना पूर्ण खात्री होती
ठामपणे संकीर्तनी
उंच उंच उडी होती

विक्रांत प्रभाकर
http://kavitesathikavita.blogspot.in/