केक कस्टर्ड

Submitted by Adm on 23 March, 2014 - 11:50
प्रत्यक्षात लागणारा वेळ: 
३० मिनिटे
लागणारे जिन्नस: 

१. स्पाँज केक : ३५० ग्रॅम (बेकरीत मिळतो तो मध्यम आकाराचा)
२. अर्धा लिटर दुध
३. कस्टर्ड पावडर : ४ टेबल स्पून
४. स्ट्रॉबेरी क्रश किंवा जॅम : लागेल तसा
५. केळ्याच्या चकत्या
६. सफरचंदाच्या पातळ फोडी
७. संत्र्याच्या बारीक बारीक फोडी
८. डाळींब, खजूर, काजू, पिस्ते जे काय आवडेल आणि उपलब्ध असेल ते.
९. पाव वाटी साखर

क्रमवार पाककृती: 

१. स्पाँज केकचे स्लाईस करून घ्यायचे आणि ते काचेच्या पसरट ट्रेमध्ये किंवा बेकींग ट्रे मध्ये मांडून घ्यायचे. (लहान सर्व्हिंग बोलमध्ये हे केलं तरी चालतं म्हणजे देताना परत ते काढावं लागत नाही.)
२. त्यावर स्ट्रॉबेरी क्रश किंवा स्ट्रॉबेरीचा जॅम जरासा पातळ करून लावून घ्यायचा.
३. त्याच्यावर केळं आणि सफरचंदाच्या चकत्यांचा थर द्यायचा. आंबट (Citrus) फळं ह्यात घालायची नाहीत.
४. एकीकडे दुधात साखर घालून ते उकळायला ठेवायचं.
५. थोडं दुध आणि कस्टर्ड पावडर ह्यांची पेस्ट करून घ्यायची आणि दुध उकळलं की ते सतत ढवळत ही पेस्ट मिसळायची. गुठळ्या होऊ द्यायच्या नाहीत. कस्टर्ड घट्टसर झालं की गॅस बंद करायचा.
६. हे गरम कस्टर्ड केक आणि फळांच्या थरावर ओतायचं.
७. वर केक स्लाईसेसचा दुसरा थर द्यायचा.
८. आता केक+फळं+कस्टर्ड असलेलं भांडं फ्रिजमध्ये सेट करायला ठेऊन द्यायचं. साधारण दिड तास ठेवायचं.
९. सर्व्ह करताना सगळ्यात वरच्या केकच्या थरावर इतर फळे (संत्रे, अननस, डाळींब वगैरे) घालायची आणि थोडं थंडं केलेलं कस्टर्ड घालायचं. सगळ्यात वर सुकामेवा घालून सजवायचं.

IMG-20140323-WA0004.jpg

वाढणी/प्रमाण: 
४ जणांसाठी
अधिक टिपा: 

१. खूप उत्साहं असेल तर केक घरी करू शकता.
२. केकचे स्लाईस खूप जाड करायचे नाहीत म्हणजे कस्टर्ड त्यात नीट मुरतं.
३. फ्रिजमध्ये सेट करायच्या आधी फक्त केळी आणि सफरचंद घालायची. Citrus fruits घालायची नाहीत. सफरचंद जरा करकरीत असतात आणि त्यामुळे बाकी सगळ्या मऊ गोष्टींमध्ये छान लागतात.
४. सेट झालेल्या केक कस्टर्डवर वरून थोडसच अजून कस्टर्ड घालायचं (नाहितर "तो काय वरण भात नाहीये कालवून खायला !" असले टोमणे ऐकायला मिळतात.)
५. अंब्याच्या दिवसांमध्ये हापूसच्या फोडीही मस्त लागतील.
६. लहान सर्व्हिंग बोलमध्येही डायरेक्ट सेट करू शकता आणि नंतर परत वाढण्यासाठीचं दुसर्‍या मोठ्या ट्रेत करायचं. आम्ही तसच केलं होतं. फक्त फ्रिज मध्ये जागा खूप व्यापली जाते.
७. स्पायची जेवणानंतर हे गार केक कस्टर्ड मस्त लागतं.
८. सेट होण्याचा वेळ वर धरलेला नाही.

माहितीचा स्रोत: 
आमच्या 'एक़्जॉटिक डेजर्ट्स' मालिकेतलं हे पुढचं पुष्प एका सासुबाईंच्या मदतीने!
पाककृती प्रकार: 
Group content visibility: 
Public - accessible to all site users

मस्त आहे Happy
आम्ही केळी टाकत नाही कारण काळी पडतात थोड्या वेळात. तुम्हाला हा प्रॉब्लेम आला नाही का?

५-७ वर्षांपूर्वी सीसीडी मध्ये एक मेन्यु आयटम होता त्यात चॉकलेट की प्लम स्पाँज केक वर व्हॅनीला आईसक्रीम चा स्कूप टाकुन देत. चांगलं लागत होतं मला आवडलं होतं Happy

ट्रायफल पुडींगसारखंच आहे (का तेच आहे? फक्त नाव वेगळं?) >>> आहे खरं सारखं.. पण ट्रायफल पुडींगमध्ये कस्टर्ड नसतं ना बहुतेक ? (मी एकदाच खाल्लय त्यामुळे आठवत नाहीये).

तुम्हाला हा प्रॉब्लेम आला नाही का? >>>> केळी नव्हती काळी पडली. कदाचित अजून जास्त वेळ ठेवलं तर पडतील.

संत्र हि सिट्रस फळ आहे....किवा गार कस्टर्ड वरति घालण्यासाठि चालेल अस मला वाटते... >>> हो बरोबर आहे. तसच लिहिलय ना वर.

सगळ्यांना धन्यवाद प्रतिक्रियांसाठी...:)

फोटो मस्त आहे... एकदम तोंपासु! करणार नक्कीच. यात द्राक्षं, स्ट्रॉबेरी पण छान लागतील का?
जॅम पातळ कसा केला?

पहिलं पुष्प कुठलं होतं? शोधायला हवं.

यात द्राक्षं, स्ट्रॉबेरी पण छान लागतील का? >>> द्राक्ष घातली होती.. वरच्या फोटोत दिसतायत.. चांगली लागतात..
स्ट्रॉबेर्‍या नाही घातल्या.. घाला आणि सांगा.. Happy

जॅम पातळ कसा केला? >>> थोSSडसं पाणी घालून चमच्यानी फेटला.. खूप घटट असेल तर सगळीकडे नीट लागत नाही आणि मग जास्त लावला जातो..

पहिलं पुष्प कुठलं होतं? >>>> Lol आम्ही अटलांटा गटगांना अशी (एक्झॉटीक) पुप्ष करून सगळ्यांना (कंपल्सरी) खाऊ घालायचो.. Proud

पूनम.. कस्टर्डच्या जागी रबडी हे वेरिएशन पण मस्त लागेल.. Wink

सगळ्यांना (कंपल्सरी) खाऊ घालायचो.. फिदीफिदी>>> आम्हाला कुठे खाऊ घातलंय? मग आम्हाला कसं समजणार??

उग्गाऽऽऽच रबडीचा तगादा लावत बसतात...
Proud

मी एकदाच खाल्लय त्यामुळे आठवत नाहीये >> हो का? कुठे बरं :फिदी:??
मस्त रे! हापूस आंबे टाकून खा ह्याच्यावर. काय सही लागेल!! हापूस टाकले की सगळंच सही लागतं म्हणा! Happy

आम्हाला कुठे खाऊ घातलंय? >>> या की कधीही! अख्खा पुष्पगुच्छच देऊ.. Happy
रबडीचा तगादा पौ ना..

सिंडे.. फोटो होता तेव्हाच,,

मो.. काय आठवत नाही आता.. फार दिवस झाले खाऊन.. Wink