तूच सांग ना काय अता मी बोलू यावर ?

Submitted by सुप्रिया जाधव. on 9 March, 2014 - 14:52

झोपेवर की त्याच्यावर फोडावे खापर ?
माझ्या स्वप्नांमध्ये हल्ली ज्याचा वावर

वास्तवतेच्या खात्यावरती खर्ची पडती
आठवणींच्या ठेवीसुध्दा जपून वापर

त्याच्या-माझ्या आत खोलवर रुजते काही
काही फुलले नाही हे भासवतो वरवर !

तुझ्या मनाचा तुला घ्यायचा कौलच नाही
तूच सांग ना काय अता मी बोलू यावर ?

कधी ठेवली मलाच नक्की माहित नाही
आयुष्याच्या पाणवठ्यावर उपडी घागर

काल शेवटी शत्रुंची यादीच बनवली
नांव स्वतःचे लिहीत गेले पूर्ण पानभर

कोण कुणाच्या मनात करते कायमचे घर ?
पक्षी उडतो दाणा-पाणी टिपल्यानंतर

मालिकेहुनी जाहिरात उसळून पहावी
मुद्दा वगळुन बोलत बसतो तसे अवांतर

तुला वाटते तितकी ती ना लेचीपेची
तिला वाटतो तितकाही नाहिस तू कणखर

कुणी कुणाचे नसते भरल्या दुनियेमध्ये
आलो शेवट आपणही या निष्कर्षावर

सांगायाचे असते काही उमगत नाही
दारुण ठरते शेवटच्या श्वासांची घर-घर

सुप्रिया

विषय: 
काव्यलेखन
Groups audience: 
गुलमोहर - गझल
Group content visibility: 
Public - accessible to all site users
शेअर करा

तुझ्या मनाचा तुला घ्यायचा कौलच नाही..
तूच सांग ना काय अता मी बोलू यावर ?

कधी ठेवली मलाच नक्की माहित नाही
आयुष्याच्या पाणवठ्यावर उपडी घागर

सांगायाचे असते काही उमगत नाही
दारुण ठरते शेवटच्या श्वासांची घर-घर<<<

चढ्या क्रमाने चांगले शेर!

Submitted by बेफ़िकीर on 9 March, 2014 - 15:14

सुंदर रचना.
<<
त्याच्या-माझ्या आत खोलवर रुजते काही
काही फुलले नाही हे भासवतो वरवर !

तुझ्या मनाचा तुला घ्यायचा कौलच नाही..
तूच सांग ना काय अता मी बोलू यावर ?

सांगायाचे असते काही उमगत नाही
दारुण ठरते शेवटच्या श्वासांची घर-घर >>

क्या बात है!

Submitted by अमेय२८०८०७ on 9 March, 2014 - 22:41

त्याच्या-माझ्या आत खोलवर रुजते काही
काही फुलले नाही हे भासवतो वरवर !

वाहवा अख्खी गझल झक्कास जमली आहे

Submitted by मयुरेश साने on 14 March, 2014 - 04:19

>>>तुझ्या मनाचा तुला घ्यायचा कौलच नाही..
तूच सांग ना काय अता मी बोलू यावर ?

कधी ठेवली मलाच नक्की माहित नाही
आयुष्याच्या पाणवठ्यावर उपडी घागर

काल शेवटी शत्रुंची यादीच बनवली
नांव स्वतःचे लिहीत गेले पूर्ण पानभर !>>>वाव्वा...वाह् ! एक सर एक!

आवडली गझल!

Submitted by सत्यजित... on 25 April, 2016 - 03:16