जय देव जय देव जय शक्तिस्थाना
गणनायक खलमारक शुभकारक सगुणा |धृ.|

विद्येचा अधिपति तू, निष्ठेचा गणपति तू
सन्मतिचा दाता तू, सम्यक तू, सुकृत तू
सन्मार्गाला लावी आम्हा गजवदना |१|

तेजोनिधि देवा तू, नवचेतन कर्ता तू,
क्रांतीचा उद्गाता, उन्नतिचा प्रेरक तू,
तिमिराला संहारी, ओजस्वी रविकिरणा |२|

विश्वात्मक देवा तू, सर्वत्रा, आद्या तू,
पंचत्वाच्या प्राणा, त्रिगुणात्मक ईशा तू,
सकलांना शांती दे, संकट विनाशना |३|

~श्रीराम