मायबोली - शीर्षकगीत : प्रकाशन

Submitted by Admin-team on 30 January, 2012 - 20:49
मायबोली शीर्षकगीताचे प्रकाशन ही सर्व मायबोलीकरांसाठी व विशेषत: या गीताच्या निर्मितीशी संबंधित सर्वांसाठी अत्यंत आनंदाची व अभिमानाची गोष्ट आहे. या उपक्रमाच्या सुरुवातीपासून सहभागी असणार्‍या सर्व मायबोलीकरांचे आणि त्यांच्या कुटुंबियांचे हार्दिक अभिनंदन. या शीर्षकगीताची जी छोटी झलक होती, तिला जसा तुम्ही भरभरून प्रतिसाद दिलात, तसेच या संपूर्ण गीतालाही तुम्ही आपलेसे कराल, अशी आशा आहे.
-मायबोली.कॉम


मायबोली शीर्षकगीत ऐका:




या उपक्रमाचे मुख्य संयोजक योगेश जोशी यांचे मनोगत:
हे गीत खर्‍या अर्थाने मायबोलीकरांचे गीत असावे आणि त्याला जागतिक स्वरूप असावे ही संकल्पना प्रत्यक्षात साकारताना मुख्यत्वे तीन गोष्टींना प्राधान्य दिले होते. गीतकार उल्हास भिडे यांनी लिहिलेल्या अतिशय दर्जेदार गीताला व त्यातील शब्दांना न्याय देणे, या गीताला दिलेल्या संगीत साजाला न्याय देणे, आणि यात सहभागी झालेल्या मायबोलीकरांच्या प्रयत्नांना न्याय देणे. दर्जात कुठलीही तडजोड न करता या सर्वांचे संतुलन राखणे ही एक प्रकारे तिहेरी कसरतच होती. शिवाय हे गीत ऐकणार्‍याच्या ओठी सहज बसेल, मायबोलीकरांना सहज गुणगुणता येईल, खेरीज हे गीत सर्व "मायबोलीकर" वा मायबोलीकर नसलेल्या सर्वांच्या मनात रुजेल, अशा प्रकारे त्याला संगीतबद्ध करायचे हेच उद्दिष्ट डोळ्यापुढे ठेवून पुढील वाटचाल करायचे ठरवले होते. या गीताशी संबंधित सर्वांचे संपूर्ण सहकार्य व सहभाग केवळ यांमुळेच ही कसरत शक्य झाली आणि एकंदरीत मायबोली शीर्षकगीत कुण्या एकाचे न राहता सर्वांचे झाले हेच या गीताचे यश म्हणावे लागेल. किंबहुना यातील सहभागी ज्येष्ठ मायबोलीकरांचे शुभाशिर्वाद, समवयस्क मायबोलीकर गायकांचे प्रोत्साहन, बालगोपाळांनी आपल्या सुरांतून गुंफलेले मोती, सर्वांच्या कुटुबियांनी दिलेला पाठींबा, आणि मायबोली संस्थापक व अ‍ॅडमिन टीम यांनी वेळोवेळी केलेली मदत व मार्गदर्शन या "पंचम" संगमातून हे गीत जणू परिपूर्ण झाले आहे. ज्यांचे संगीत ऐकून आमच्या पिढीची कर्णेंद्रिये "सूर" समजू लागली आणि नादब्रह्माचे माझे दैवत- पंचम दा (आर.डी. बर्मन) यांचा जणू अशाप्रकारे आशीर्वाद या गीताला लाभला आहे असे मी मानतो.

यातील सहभागी जवळ जवळ सर्वच मायबोलीकर (एक दोन अपवाद वगळता) हे व्यावसायिक गायक नाहीत. त्या सर्वांनी आपापले दैनंदिन व्यवसाय, घर, जबाबदार्‍या हे सर्व संभाळून या गीतासाठी केलेली मेहनत व सर्व प्रकारे केलेली मदत, या सर्वाचे मोल माझ्या लेखी अधिक आहे. जगाच्या वेगवेगळ्या भागात वा शहरात राहणार्‍या तरीही "मायबोलीकर" या एका नात्याने एकाच मायबोली कुटुंबाचे सदस्य असलेल्या अशा या गीताशी संबंधित सर्वांचे योगदान याला "मायबोली स्पिरीट" असे म्हटले तर वावगे ठरू नये.

या जागतिक मायबोली गीताचा गेले जवळ­जवळ पाच महिने सुरू असलेला अद्भुत प्रवास आज अंतिम मुक्कामी पोहोचला आहे. या संपूर्ण प्रवासात या गीतातील प्रत्येक शब्द या गीताशी संबंधीत सर्वांनीच अक्षरशः जगला आहे हे सर्वांच्या अनुभव लेखनातून स्पष्ट होते.

या शीर्षकगीताच्या विस्मयजनक वाटचालीचे व्यापक स्वरूपः
जगभरातील पाच देशातील विविध शहरांमध्ये स्थायिक असलेले आणि वय वर्षे चार ते साठ या वयोगटातील असे २१ मायबोलीकर गायक, संगीतकार, संगीत संयोजक व वाद्यवृंद. मुंबई, पुणे, दुबई या शहरांतील स्टुडियोंमध्ये व ईंग्लंड, अमेरिका, कुवेतयेथिल मायबोलीकरांनी घरीच केलेले ध्वनिमुद्रण, अनेकविध वाद्यांचा वापर, तसेच आंतरजालावरील इमेल, वेबचॅट, स्काइप, सारख्या तत्सम तंत्रांच्या सहाय्याने या गीताच्या शब्द, सूर यांची झालेली देवाणघेवाण, सरावसत्रे, आणि शेवटी आंतरजालावरच (मायबोली.कॉम) या गीताचे होणारे प्रकाशन.

जवळ जवळ पंधरा वर्षांचा इतिहास व दर्जेदार साहित्यिक परंपरा असलेल्या "मायबोली.कॉम" या संकेतस्थळाची आजवरची ओळख ही "मायबोलीशी नातं सांगणार्‍या जगभरच्या पाऊलखुणा" अशी असली तरी या मायबोली शीर्षकगीतामुळे आजपासून "आंतरजालाच्या जागतिक नकाशावर मायबोलीच्या पाऊलखुणा" आता कायमस्वरूपी कोरल्या गेल्या आहेत, असेच एक मायबोलीकर म्हणून म्हणावेसे वाटते.

मायबोलीच्या इतिहासात या शीर्षकगीताच्या रूपाने फूल ना फुलाची पाकळी म्हणून एक कायमस्वरूपी ठेव या गीताशी संबंधीत सर्वांच्या नावाने कायम राहील या भावनेने नतमस्तक व्हायला होते आणि मायबोलीचा अभिमान वाटतो.

वर म्हटले तसे मुळात गीताचा आत्मा श्रीमंत आहे. त्याला सुरात साकारणारे कलाकार यांचे प्रयत्न व कार्यासक्ती तितकीच उल्लेखनीय आहे. त्यामुळे जर काही दोष, उणीव असेल तर या गीताचा संगीतकार व या टीमचा एक प्रतिनिधी या नात्याने त्या जबाबदारीची मला संपूर्ण जाणीव आहे. खरे तर कुठलीही कलाकृती (गीत, संगीत, चित्र, इ.) ही जास्ती जास्त वाचक, श्रोत्यांपर्यंत पोहचावी हेच कुठल्याही कलाकारासाठी सर्वात महत्वाचे असते. कलाकाराचा आणि त्याचबरोबर कलेचाही विकास होण्यात ही गोष्ट अत्यंत महत्त्वाची आहे यात दुमत नसावे. मायबोलीने असे जागतिक व्यासपीठ उपलब्ध करून दिल्याने आज हे गीत शब्दशः सातासमुद्रापार पोहोचले आहे. एखाद्या कलाकाराला अधिक काय हवे?
बाकी रसिक श्रोता हाच मायबाप सरकार असल्याने त्याचे मत, अभिप्राय, आवड, निवड सर्वच शिरसावंद्य!

मायबोली शीर्षकगीत हे निव्वळ गीत नसून एक विचार आहे, संकल्पना आहे, अनुभव आहे, अभिव्यक्तीचे प्रकटीकरण आहे. म्हणूनच निव्वळ शब्द, सूर, ताल, लय या चौकटीत न अडकता हे गीत रसिक श्रोत्यांच्या मनाच्या संवेदनातून हृदयाच्या गाभार्‍यात वसेल अशी प्रामाणिक सदिच्छा व्यक्त करतो.

-योग (योगेश जोशी)


वरील गीतातील गायक क्रमः (मूळ गीत ईथे आहे.)
[मायबोली.....] (भुंगा)
भाषा मराठमोळी, हर अंतरी फुलावी
घेऊन ध्यास आली उदयास मायबोली (अनिताताई, योग)
भाषा मराठमोळी, हर अंतरी फुलावी
घेउन ध्यास आली उदयास मायबोली ║धृ║ (समूह- मुंबई, पुणे, दुबई)

मिटवून अंतराला, जोडून अंतरांना
ही स्नेहजाल विणते, विश्वात मायबोली (अगो व पेशवा)
[विश्वात मायबोली] (भुंगा) ||१||

सदरांच्या पदरांनी, प्रत्यंगी नटलेली (अनिलभाई)
सदरांच्या पदरांनी, प्रत्यंगी नटलेली (अंबर व जयवी)
साहित्य वाङ्मयाची, ही खाण मायबोली (सई) ||२||

[युडलिंग (योग) आणि कोरस (अनिताताई, रैना)]

सार्‍या कलागुणांना, दे वाव मायबोली (प्रमोद देव व रैना)
सार्‍या नवोदितांची, ही माय मायबोली (प्रमोद देव, व रैना)
सार्‍या नवोदितांची, ही माय मायबोली (देविका, कौशल, सृजन व समूह- विवेक देसाई, भुंगा, प्रमोद देव)
ही माय मायबोली (सृजन)
भाषा मराठमोळी, हर अंतरी फुलावी (दिया व समूह)
घेउन ध्यास आली उदयास मायबोली (दिया व समूह) ||३||

चर्चा, मतांतरांची, अन् वादविवादांची (वर्षा व अनिताताई)
[मधले संवाद- भुंगा, रैना व योग]
चर्चा, मतांतरांची, अन् वादविवादांची (मिहीर)
परिणती सुसंवादी, घडविते मायबोली (मिहीर व समूह- विवेक देसाई, भुंगा, प्रमोद देव)
परिणती सुसंवादी, घडविते मायबोली (अनिताताई, सई, स्मिता, पद्मजा) ||४||

सहजीच जीवनाचा, अविभाज्य भाग झाली (योग व सारिका)
[हार्मनी समूह-भुंगा, प्रमोद देव, विवेक देसाई, पद्मजा, सई, स्मिता]
अमुच्या मनी विराजे, अभिजात मायबोली (योग, सारिका व सर्व गायक)
अमुच्या मनी विराजे, अभिजात मायबोली (पुरूष व स्त्री गायक)
अभिजात मायबोली (सर्व) ║५║

मायबोली.. (सर्व गायक)


संपूर्ण श्रेयनामावली:
गीतकारः ऊल्हास भिडे
संगीतकारः योग (योगेश जोशी)
गायकः
मुंबई: रैना (मुग्धा कारंजेकर), अनिताताई(अनिता आठवले), प्रमोद देव, भुंगा (मिलींद पाध्ये), सृजन (सृजन पळसकर- मायबोलीकर युगंधर व भानू यांचा मुलगा)
पुणे: विवेक देसाई, सई (सई कोडोलीकर), पद्मजा_जो (पद्मजा जोशी), स्मिता गद्रे, अंबर (अंबर कर्वे), सायबर मिहीर (मिहीर देशपांडे)
दुबई (सं. अरब अमिराती): देविका आणि कौशल केंभावी (मायबोलीकर श्यामली ची मुले), सारिका टेंबे (सौ. योग), दिया जोशी (योग व सारिका ची मुलगी), योग (योगेश जोशी), वर्षा नायर
कुवेतः जयवी-जयश्री अंबासकर
इंग्लंडः अगो (अश्विनी गोरे)
अमेरिका: पेशवा (जयवंत काकडे), अनिलभाई (अनिल सांगोडकर)
वाद्यवृंदः प्रशांत लळीत, विजू तांबे, ऊमाशंकर शुक्ल, जगदीश मयेकर, योग
संगीत संयोजकः प्रशांत लळीत
ध्वनिमुद्रण तंत्रज्ञः
  • नदीम- ईंम्पॅक्ट स्टुडीयो, सांताक्रुझ, मुंबई.

  • जयदेव- साऊंड आइयडीयाझ, एरंडवणे, पुणे.

  • संजय- नेहा ऑडीयो ईफेक्टस, दत्तवाडी, पुणे.

  • मेरशाद- अल शिबाक मुझिक सेंटर, दुबई.

मायबोली विभाग समन्वयकः दक्षिणा (पुणे), प्रमोद देव (मुंबई), अनिलभाई (अमेरिका)
झलक ऑडियो व्हिज्युअल टीम - आरती खोपकर (अवल), नंदन कुलकर्णी (नंद्या), हिमांशु कुलकर्णी (हिम्सकूल) आणि आरती रानडे (RAR) निर्मिती: maayboli.inc

*****

डाऊनलोड / Download:

मायबोलीचे शीर्षकगीत तुम्ही या दुव्यावरून तुमच्या संगणकावर/MP3 प्लेयरवर उतरवून घेऊ शकता.

रिंगटोनः
खास लोकाग्रहास्तव योगेश जोशी यांनी आपल्या शीर्षकगीताचे २ रींगटोन बनवले आहेत. ते तुम्ही खालील दुव्यांवर right click करून आपल्या संगणकांवर्/फोनवर साठवू शकता.
रींगटोन १ - आलाप
रींगटोन २ - ध्रुवपद


कायदेशीर सूचना:

१) संपूर्ण गाणं मायबोलीवरून डाऊनलोड करता येईल. गाण्याचे सगळे हक्क मायबोलिकडे असले तरी गाणं डाऊनलोड करणे, गाण्याची हवी तितकी वेळा कॉपी करणे, दुसर्‍याला देणे, कुठल्याहि माध्यमात (radio, TV etc), सार्वजनिक रित्या वाजवणे हे सगळे करण्याचा पूर्ण कायदेशीर परवाना असेल. कुणाचीही परवानगी लागणार नाही.

२) इतकेच नाहि तर कुणिही आपल्या ब्लॉगवरूनही त्याची प्रत Download साठी ठेवू शकतो. फक्त यासाठी काम केलेल्या सगळ्यांचा आदर म्हणून आणि त्यांना त्याचे श्रेय मिळावे म्हणून maayboli.com/sheershakgeet ही लिंक द्यावी लागेल.

३) गाण्याचे काहीच तुकडे दुसर्‍या कामात वापरणे, गाण्यात बदल करणे, वाजवण्याव्यतिरिक्त इतर कुठलाही आर्थिक फायदा मिळवणे (उदा. फक्त याच एकट्या गाण्याची सीडी करून विकणे), गाणे किंवा गाण्याचा भाग मायबोलीच्या कारणाव्यतिरिक्त इतर कुठेही जाहिरातीसाठी (किंवा इतर कुठल्याही कारणासाठी) वापरणे असे करता येणार नाही.

४) एखाद्या सीडी अल्बममधे इतर गाण्यांबरोबर जर मायबोली गीत समाविष्ट करायचे असेल तर खालील अटींनुसार परवानगी असेल. गाणे संपूर्ण असावे, आणि maayboli.com/sheershakgeet ही लिंक असावी आणि या गाण्याचे सर्व हक्क मायबोलीकडे आहेत याचा उल्लेख पॅकेजिंगवर असावा. पण वर २ मधे लिहल्याप्रमाणे फक्त या एका गाण्याचा (किंवा टीझरचा) अल्बम करता येणार नाही.


कदाचित मराठी गाण्यांच्या इतिहासात हे पहिलंच गाणं असेल की गाण्याचे मालकी हक्क असूनही रितसर हव्या तितक्या वेळा कॉपी करण्याची, वाजवण्याची कायदेशीर परवानगी दिली जाते आहे. त्यामुळे प्रत्येक प्रत आपोआप कायदेशीर असेल.
विषय: 
शब्दखुणा: 
Group content visibility: 
Public - accessible to all site users

>>मी आलापाचा रिंगटोन ठेवणार माझ्या फोनवर

ललिता-प्रिती,
मलाही तोच आवडतो!

रच्याकने: तो आलापही नाही, तानही, नाही आपण त्याला "साद" म्हणूयात!

मस्त! ऐकले मायबोली शीर्षकगीत मी :) पुन्हा पुन्हा ऐकते आहे.
बासरी सुरेख. फार आवडली. सगळ्यांनी सुरेख गायले आहे. शब्द, सूर, स्वर सारेच जमून आले आहे.
अख्ख्या टीमला ह्या गाण्यासाठी मनापासून धन्यवाद!

>>>> तू व ईतर म्हणतील मी किती बोलतोय <<<<<
अरे नै रे बाबा, उलट हीच माहीती उपयुक्त ठरते :) अक्कलेत थोडी अधिक भर पडत्ये :)
हे असे काही असते ते सर्वसाधारणतः ऐकिव/इम्याजिनेशनवर माहित होते, पण तपशीलात टेक्निकली समजावुन सान्गितल्याबद्दल मनःपूर्वक धन्यवाद :)
मूळात वेगवेगळे ट्रॅक्स रेकॉर्ड करुन ते पुन्हा मिक्स वगैरे करणे हे सोप्पे नाहीच्चे याची कल्पना आहे. :) प्रचंड अवघड अन संयमाची परीक्षा पहाणारे असे ते काम आहे.
अन मी "तृटी" या स्वरुपात सान्गत नसून, हा प्रयोग यशस्वीरित्या केलाच्च आहे तुम्ही, तर थोडे अधिक पुढे जाऊन, याच गीताची ओळख अजुन विस्तारित करा असे काहीसे सान्गु पहातोय. :) (श्शी, साल आम्हाला स्वप्न देखिल धुसर धुसरच दिस्त :P नीट स्पष्टपणे दिसत नै, अन म्हणून उलगडून सान्गता येत नाही, असो.)
सविस्तर उत्तराबद्दल धन्यवाद :)

>>२.३) शॉर्ट व्हर्जनचा आग्रह अशासाठी की, हेच गाणे, यच्चयावत मराठी भाषिकांस "मायबोली साईटाचा" वा "मायबोली मराठीचा" असा कोणताही संदर्भ घेऊन आपलेसे वाटावे. अपेक्षा अशि की मायबोली साईटचे हे शीर्षकगीत/ओळखगीत, मराठी साहित्य/नाट्य वगैरे सम्मेलनान्चे उद्घाटनाचे पद्य असावे/व्हावे. योग व टीमला हे अशक्य नाही.
>>[डिमांड वाढत चालल्यात :-)]

लिंबू, मिहीर,
सूचना चांगल्या आहेत. मधील संवाद-शब्दांबद्दल: त्याच निमीत्ताने लोकं "मायबोली" नेमके काय आहे हे पहायला उत्सूक होवू शकतील. आणि "हटकेश्वर" चा आगापीछा जाणून घ्यायला येणारे अस्सल मायबोलीकर व्हायची शक्यता अधिक (त्या शब्दाची महतीच एव्हडी थोर आहे! :) भुंग्याने त्याला "चेरी" म्हणायचे पातक केले आहे, नशीब अजून त्या शब्दाचे "जनक" प्रकटले नाहीत. नाहीतर भुंग्याचि खैर नव्हती!)
पण या शीर्षकगीत "निवड" प्रक्रीयेत सामील असल्याने मला हे माहित आहे की हे गीत "मायबोली.कॉम" शी विशेष संबंधीत असेल, "मायबोली" (संकेतस्थळाचे) चे प्रातिनिधीक असेल हाच मुख्य दृष्टीकोन, निकष ठेवून परिक्षकांनी याची निवड केली होती. त्यामूळे आता ते गीत मायबोली-मराठी चा विस्तृत दृष्टिकोन ठेवून थोडे वेगळे करणे म्हणजे "आता ईडलीचे पीठ घातलेच आहेत तर त्यातूनच डोसाही घाला" असे म्हणण्यासारखे आहे.. करता येईल, पण प्रश्ण तत्वाचा आहे! :)

मुळात या गीतातील कुठलाच भाग सुटा, वेगळा, करून वा गाळून वगैरे ते गीत पुनः कुठल्यातरी स्वरूपात बनवणे हे एकूणात एकंदर गीताच्या स्वरूप व संकल्पनेला छेद देणारे आहे. असो. "मायबोली" चे शीर्षकगीत असल्याने त्याचे पुढे काही वेगळे करायचे असल्यास तो निर्णय मायबोली प्रशासनाचा असेल. वैयक्तीक त्यात जी काही मदत लागेल ती मी करेन हे मी त्यांना आधीच कळवलेले आहे.
तेव्हा तुमच्या सर्व सूचना वगैरे अ‍ॅडमिन वाचत असतील असे गृहीत धरुयात!

मी काल रात्री पासून ६ वेळा ऐकले.. :) सुंदर एकदम.. श्रवणीय. ऐकत राहावे असे.. :)

भुंग्याने सुरवात मस्त केलीय. अनिता ताई आणि रैना यांचे आवाज छान आहे. अनिलभाई यांच्या आवाजावरून त्यांचे व्यक्तिमत्व कसे असेल याची प्रचीती येते.. :) दिया आणि सृजन यांचे आवाजही गोडं.. :)

सर्वांनी इतकी मेहनत घेऊन हे बनवले आहे की तोड नाही... :) मायबोली वर मी आहे याचा सार्थ अभिमान आहे आणि तो अधिकच वृन्धिगत झाला आहे...

सर्वांचे मनापासून अभिनंदन आणि धन्यवाद..

या सर्व मंडळींचं कौतुक करायला पुरेसे शब्दच नाहीत. गीत ऐकून कर्णेंद्रिये अंमृताचे बोल प्राशन करताहेत असे वाटले. हृदयातील खोलातल्या खोल कप्प्यात जी काही जागा असेल तिथून भिडे, योग, सर्व गायक, व इतर सहकारी यांचे अभिनंदन करतो.

छान

सेनापती, व ईतर सर्वांना
धन्यवाद!

संतू,

तुमच्या सारख्या जाणकारांचा अभिप्राय वाचून खूप छान वाटले.
त्याच बरोबर तुमच्या प्रोफाईल मध्ये तुम्ही सॅन डीयेगो येथे आहात असे वाचले. त्यामूळे "घरच्या" मंडळींनी केलेले कौतूक असे म्हणायला हवे :)

तो आलापही नाही, तानही, नाही आपण त्याला "साद" म्हणूयात! >>> याच चालीवर म्हणावंसं वाटतं की हे गाणं शीर्षकगीतापेक्षाही 'थीम साँग' (मराठी प्रतिशब्द??) म्हणून अधिक योग्य आहे. :)

या गीता साठी परिश्रम करणार्‍या सर्वांचे अभिनंदन. या प्रोजेक्टचा आवाका खूपच मोठा आणि सर्वदूर पसरलेला असून सुद्धा तो तुम्ही उत्कृष्ट रित्या पार पाडल्याबदाल पुनः एकदा अभिनंदन.

झकास! योगेश मस्त जमून आलय सगळाच. ईतक्या वेगवेगळ्या आवाजांच वेगवेगळ्या ठिकाणी केलेले रेकोर्डिंग असुनही ऐकण्यात तसे वाटत नाही. मुख्यत्वे करून हेड फोन माइक वरून झालेले रेकोर्डिन्ग बद्दल मी जरा सशंक होतो कि स्टुडिओ रेकोर्डिन्ग समोर ते एक्दम वेगळे वाटेल. पण तसे अजीबात न वाटता मस्त एक्संध फील आलाय त्यामुळे मस्तच एंजॉय होतय गाण!

योगेश हॅटस ऑफ! बाकी ज्या ज्या लोकानी भाग घेतला त्यांचे पुन्हा अभिनंदन !

याला मायबोलीगीत असे सुटसुटीत नाव द्या. :)

आणि माध्यम प्रायोजक, याची प्रेस रीलीज करून विविध मराठी प्रकाशनाना पाठवता येइल का? रीलीजचा मुख्य फोकस भौगोलिक सीमा भेदून, तंत्रज्ञानाच्या सहाय्याने बनवलेले गीत असा ठेवता येइल. (मी पूर्ण प्रेस रीलीजच लिहू का? :फिदी:)

सुरुवात ऐकली, तिथूनच भारावलो, भुंग्याचा आवाज कसलेला आहे :) वाद्यवृंद, संगीत सारंकाही सुंदर, श्रवणीय, झलक ऐकली होती तेंव्हापासून खूप उत्सुक होतो हे गीत ऐकण्यासाठी आज संधी मिळाली आणि सोनं झालं, ज्यांच्या लेखणीतून हे उतरलं त्या भिडेकाकांना त्याला संगीतात बध्द करण्यार्‍या योग ला आणि गीतात सहभागी असलेल्या सर्व (पिल्लावळीसह) कलाकारांना धन्यवाद.. धन्यवाद याच साठी की आमची मायबोली नक्की काय आहे हे आता इतरांना मी ऐकवू शकतो :)
बाकी काही उत्सूकता अजून आहेत,
हा असा जगभरातला आवाज एकवटला कसा ? याबद्दल अधिक माहीती मिळेल का ?
गीतातले मधले संवाद टाकायची अचाट कल्पना कुणाची की ते ही भिडेकाकांनीच मूळ गीतात लिहीले होते आणि महत्वाचं म्हणजे.
भिडेकाका आणि देवकाका हे चिरंजीव असावेत काय ? ;)

अ प्र ति म्म.....!
मधल्या संवादांनी आणि त्या युडलिंग ने मजाच आणलीये..!!
बाळांचे आवाज तर कित्ती गोड....
एकदंर, अगदी लहान मुलांपासून ते आपल्या काकांपर्यंतच्या सर्व वयोगटांचा समावेश करत, शीर्षकगीत उत्तमच सादर झालं आहे!

रिंगटोन्स साठी विशेष आभार..डाऊनलोड केल्यात...

संपूर्ण टीम साठी ३ चीअर्स!!
आभार आणि मनापासून अभिनंदन...
:)

मायबोलीचे किमान हजार अस्सल सदस्य आहेत असे गृहित धरले तर त्यामानाने हा प्रतिसाद खूपच थंड म्हणायला हवा.

सुंदर. सर्वांनी किती मेहनत घेतली ते वाचते आहे. इतकं मोठं काम तेही जगभर पसरलेलं, सुरेख जमवलंत. योग आणि सर्व चमूचं अभिनंदन.

झकास जमलंय शीर्षकगीत! सगळ्या टीमचं, खास करून चिमुकल्यांचं मनापासून अभिनंदन! आणि
__/\__!
खूप मस्त वाटतंय ऐकताना. :)

सेनापती,
छान वाटलं वाचून.. धन्यवाद! बोटीवर रोज सकाळी भोंग्या ऐवेजी "भुंगा" (मायबोली..sss) वाजतो असे म्हणूयात काय? :)

>>हा असा जगभरातला आवाज एकवटला कसा ? याबद्दल अधिक माहीती मिळेल का ?
गीतातले मधले संवाद टाकायची अचाट कल्पना कुणाची की ते ही भिडेकाकांनीच मूळ गीतात लिहीले होते
कवठीचाफा,
वर (आधीच्या पोस्ट्स मध्ये) लिहीले आहे की...

मायबोली शीर्षकगीत सुरेख आहे. सगळ्या कलाकारांचं अभिनंदन. शिवाय प्रत्येक प्रत कायदेशीर हे तर फारच छान...

सही! सह्ही!! सह्हीच!!! :)

काय अप्रतिम, सुंदर झालय हे मायबोली गीत!! ग्रेट जॉब!!!

चाल पण अगदी गुणगुणत रहावी अशी :) संगित, कॉम्पोझिशन सगळच सुरेल :)

सर्वांचे आवाज छानच, छोट्या दोस्तांचे खुप्पच गोड :)

एकदम हटकेश्वर, हटकेश्वर गीत आहे अगदी :)

उल्हासकाका, देवकाका, योग आणि अ‍ॅडमिन यांचे खास अभिनंदन!!! :)

सगळ्या टीमला धन्यवाद आणि अभिनंदन :)

जियो मायबोली :)

Pages