अन्यायाच्या विरुद्ध कोणी तोंड उघडुनी बोलत गेले..
मुस्कटदाबी झाली तैसे धुमसत गेले, पेटत गेले!

डोक्यावरती पाय ठेवुनी चढले कोणी, मोठे झाले,
तेच लोक त्या डोक्यांना मग लाथेखाली चिरडत गेले!

रणभूमी पाहिली नसावी, अशी जयांची असे अवस्था,
शूरपणाच्या पोकळ बाता मोठ्या तोंडी मारत गेले!

तप्त निखारे फुलले, काही जळले, त्यांची राख जाहली,
चतुराईने कोण तयांना फुलवत गेले, विझवत गेले?

रक्ताचे केलेले पाणी, निढळाचा जो घाम गाळला,
पोटी नाही कांदा-भाकर, काय न्याय ते मिळवत गेले?

डार्विनचा सिद्धांत चालतो, शक्ती टिकते, दुबळे मरते,
'शरद' जयांच्या हाती सत्ता, दीन जनांना ठोकत गेले!!

शरद